هل قد حسيت إنك الجندي المجهول؟

هل قد حسيت إنك الجندي المجهول؟

شعور أواجهه في كل مرة أطلع وأصوّر كل اللي حولي ما عدا نفسي،

من أكثر الأشياء اللي كنت وما زلت أعاني منها كصانع محتوى هو إني احتاج أحد يصورني،

مو بس كذا، يصورني وهو فاهم جوّي.

لكن في كثير من الأحيان اللي يصير واحد من اثنين:

- اللي معايا ما له في التصوير.

- ألمّح بإنه يصورني وأنا مدري بس مافي فايدة.

شيء واحد تحتاج تعرفه عني هو إني ما أحب أقول لأحد يصورني— ولو إنه في معظم الأحيان هذا اللي يصير😅

لأني أحب أتصور وأنا ما أدري، وأكون فعلًا ما أدري..

إذا كنت بنفس وضعي هذي ثلاث طرق تساعدك تصور نفسك بدون ما تعتمد على أحد:

١. المرايات

المرايات تعطيك بُعد آخر مختلف عن الصور المعتادة، وهي من أكثر العناصر اللي أدوّر عليها في أي مكان أصور فيه،

المرايات تعكس الضوء، تضيف عمق، وتفضح اللي خلف الكواليس— وهذا أجمل ما فيها🤣.

هذي الطريقة تنفع مع أي سطح عاكس، مو بالضرورة مرايا.

٢. زاوية المنظور الأول (POV)

زاوية المنظور الأول (POV) تكسر الحواجز بين المصور والمشاهد، بدل ما تشوف صورة عادية من المنظور الثالث، راح تشوف صورة من منظور المصور، وكأنك تعيّش المشاهد نفس التجربة اللي عاشها المصور—إن صح التعبير.

لما تصور بالمنظور الأول المشاهد راح يرتبط أكثر مع الصورة، لأنه راح يستوعب إنه المصور بيشوف البيئه اللي حوله بنفس الطريقة اللي هو يشوفها، مو بالضرورة فنّيًّا لكن بيولوجيًا😄.

٣. المؤقت الذاتي

وحدة من أكثر الأسئلة اللي كانت تدور في بالي هو كيف أصوّر نفسي وكأنه في شخص يصورني؟

والحل اللي اكتشفته هو المؤقت الذاتي،

هذي الطريقة هي الأفضل من ناحية احترافية الصور لكنها تتطلب جهد أكبر وقت التصوير بعكس الطريقتين الأولى.

اللي تحتاجه شيئين:

- كاميرا احترافية.

- حامل الكاميرا (Tripod).

في حال كنت تصوّر بكاميرا احترافية هذي الخطوات اللي اتبعها:

١.أحمّل تطبيق الكاميرا على جوالي: إذا كاميرتك نيكون حمل تطبيق SnapBridge، وإذا كانون تطبيق Canon Camera Connect وهكذا. هذي الخطوة راح تسهّل عليك كثير لأنه التطبيقات توفر خاصية التصوير عن بعد (Remote Photography) واللي تسمح لك تصور وإنت في المشهد بدون ما تضغط زر التصوير على الكاميرا.

٢. اختار العدسة: العدسة تحدد منظور الصورة وبناءً على المنظور تمركز الكاميرا.

٣.أكوِّن الصورة: التكوين يعتمد بشكل كبير على العدسة المستخدمة. تقدر تستخدم أي قاعدة من قواعد التكوين لكن أنصح بإنك تستلهم التكوين من الصور اللي تعجبك— أفضل من "قواعد" تتبعها.

٤. أصوّر إلين أوصل لصورة تعجبني: جرّب زوايا وعدسات مختلفة، وتذكر إنه مافي طريقة وحدة للصورة الجيدة.

ملاحظة: تقدر تصور بنفس الطريقة على الجوال باستخدام خاصية المؤقت في تطبيق الكاميرا.

هذي الطرق اللي استخدمها في كثير من صوري واللي غيّرت شعوري وقت التصوير من الجندي المجهول للجندي المعلوم😄.

شكرًا لوقتك،

باسل